NursingNetUK

Trosolwg o'r swydd

Mae cyfle cyffrous wedi dod ar gael i unigolyn brwdfrydig a dynamig wneud cais am rôl Nyrs Glinigol Arbenigol a fydd yn gweithio ledled Sir Gaerfyrddin ac yn cael ei lleoli yn Ysbyty Cyffredinol Glangwili. Byddwch yn gweithio yn nhîm y Nyrsys Gwrthgeulo Arbenigol, a gyda Meddygon Ymgynghorol a'r Tîm Amlddisgyblaethol. Mae sgiliau cyfathrebu a rheoli amser rhagorol yn hanfodol i gydweithio â chleifion, y cyhoedd a staff proffesiynol ar draws y sbectrwm iechyd a gofal cymdeithasol, ac i ddarparu a pharhau i ddatblygu gofal o safon uchel i gleifion sy’n cael therapi gwrthgeulo, a hynny gyda’r nod o hybu iechyd ac atal clefydau.

Mae rôl Nyrs Glinigol Arbenigol Gwrthgeulo yn cynnwys y canlynol:

Hyrwyddo gofal cleifion o safon uchel ym mhob agwedd ar y gwasanaeth nyrsio gwrthgeulo.

Derbyn cyfeiriadau newydd ar gyfer triniaethau gwrthgeulo, cynnal cyfweliadau asesu a darparu addysg barhaus i gleifion.

Cynnal clinigau monitro gwrthgeulo, a goruchwylio ymarfer gweithwyr cymorth.

Dehongli canlyniadau a phennu dosau gwrthgeulo, a hynny gan ddefnyddio meddalwedd gwneud penderfyniadau â chymorth cyfrifiadur.

Asesu a dechrau triniaethau ar gyfer cleifion a atgyfeirir gan eu meddyg teulu a'r Adran Damweiniau ac Achosion Brys ar Lwybr Thrombosis Gwythiennau Dwfn (DVT) triniaethau dydd.

Darparu addysg gwrthgeulo/thromboproffylacsis ar ddiwrnodau cynefino meddygon a diwrnodau tiwtoriaeth nyrsys.

Arwain o ran archwiliadau gwrthgeulo, a chynorthwyo gydag archwiliadau thromboproffylacsis.

Prif ddyletswyddau'r swydd

Rheoli’r gwaith o ddarparu gwasanaethau gwrthgeulo dan arweiniad nyrsys yn y Bwrdd Iechyd, a hynny gyda chymorth clinigol yr Hematolegwyr Ymgynghorol.
Derbyn atgyfeiriadau uniongyrchol gan weithwyr proffesiynol gofal iechyd sylfaenol ac eilaidd ar gyfer cleifion y mae arnynt angen therapi gwrthgeulo, a hynny er mwyn osgoi’r angen iddynt orfod cael eu derbyn i’r ysbyty, a hyrwyddo rhyddhau cynnar.
Darparu gofal dan arweiniad nyrsys sy'n dilyn protocolau cytunedig ar gyfer dechrau a chynnal therapi gwrthgeulo yn achos cleifion allanol â ffibriliad atrïaidd. Defnyddio gwybodaeth arbenigol a sgiliau clinigol mewn clinigau dan arweiniad nyrsys. Dadansoddi, dehongli a gweithredu ar ganlyniadau, a'u cyfleu mewn modd sensitif i'r claf a ffynhonnell yr atgyfeiriad. Dadansoddi, cydgysylltu, trefnu a monitro triniaeth ar gyfer cleifion sy'n cael therapi gwrthgeulo, gan ddilyn protocolau cytunedig. Mae hyn yn cynnwys addasu'r dosau yn unol â chanlyniadau profion gwaed, a rheoli triniaethau brys ar gyfer cleifion sydd mewn perygl o thrombosis/waedu oherwydd rhy ychydig/gormod o wrthgeulo.

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 12,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu i bron 400,000 o bobl ar draws chwarter ehangdir Cymru. Gwnawn hyn mewn partneriaeth a’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy:

4 prif ysbyty (Bronglais, Aberystwyth, Glangwili, Caerfyrddin, Tywysog Philip, Llanelli, ac Llwynhelyg, Hwlffordd).

5 ysbyty cymunedol (Ysbyty Dyffryn Aman ac Ysbyty Llanymddyfri yn Sir Gaerfyrddin, Ysbyty Tregaron yng Ngheredigion,Ysbyty Dinbych-y-pysgod a Chanolfan Adnoddau Iechyd a Gofal Cymdeithasol De Sir Benfro yn Sir Benfro.

Dwy ganolfan gofal integredig (Aberaeron ac Aberteifi, yng Ngheredigion). 
Cyfleusterau cymunedol, gan gynnwys:

48 Meddygfa, 49 Deintyddfa, 98 Fferyllfa Gymunedol, 44 Practis Offthalmig Cyffredinol (gan gynnwys gwasanaethau iechyd llygaid a golwg gwan), 38 safle yn darparu gwasanaethau iechyd meddwl ac anableddau dysgu, gofal o fewn eich cartrefi eich hun

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.