NursingNetUK

Trosolwg o'r swydd

Mae cyfle wedi dod ar gael i Nyrs Staff gofrestredig frwdfrydig a llawn cymhelliant weithio yn ein Huned Gardioleg fodern, flaengar yn Ysbyty Cyffredinol Glangwili

Mae'r uned yn cynnwys chwe gwely gofal coronaidd acíwt a saith gwely gofal cardiaidd llai dwys. Mae gennym hefyd y cyfleuster i fonitro 14 o welyau telemetreg ar wardiau cyfagos.

Rydym yn gofalu am gleifion a dderbynnir ag amrywiaeth o gyflyrau, gan gynnwys cnawdnychiant myocardiaidd, methiant y galon, endocarditis, arhythmia cardiaidd, cardiofersiynau, embolismau ysgyfeiniol a strôc sy'n gofyn am thrombolysis.

Uned Gofal Cardiaidd Glangwili yw canolfan dychwelyd adref Hywel Dda hefyd ar gyfer cleifion codiad ST ar ôl ymyrraeth gardiaidd sylfaenol drwy'r croen. Gan weithio'n agos gyda'n pedwar meddyg ymgynghorol cardiaidd, rydym yn cynnig rheolydd calon parhaol, gwasanaeth ecocardiogram trawsoesoffagaidd ac ecocardiogram straen dobutamine, a hynny ar gyfer ardal gyfan Bwrdd Iechyd Prifysgol Hywel Dda.

O fod yn rhan o'n tîm cyfeillgar, cefnogol, proffesiynol byddwch yn gweithio'n agos gydag arbenigeddau eraill yn yr ysbyty yn gofalu am gleifion sy'n sâl ddifrifol ac y mae angen iddynt gael gwasanaeth monitro cardiaidd yn yr uned. Rydym yn annog unrhyw un sydd â diddordeb yn y tîm nyrsio cardiaidd i wneud cais. Rydym yn annog datblygiad staff a darperir hyfforddiant a chymorth i ymgeiswyr llwyddiannus.

Bydd oriau llawn-amser a rhan-amser yn cael eu hystyried.

Cynhelir y cyfweliadau ar 12/12/24

Prif ddyletswyddau'r swydd

Asesu anghenion nyrsio'r cleifion, a chynllunio, gweithredu a gwerthuso gofal nyrsio er mwyn sicrhau y darperir gofal effeithiol i gleifion. Asesu addasrwydd y claf i gael ei ryddhau yn dilyn adolygiad meddygol, a dechrau trefniadau i gynllunio i'w ryddhau Cysylltu â thimau amlddisgyblaethol, fel y bo'n briodol, i gynorthwyo gyda chynlluniau rhyddhau cymhleth.

Cyflawni triniaethau wrth ofalu am gleifion, e.e. cathetreiddio, tynnu pwythau, technegaseptig. Sicrhau bod y claf yn cael ei baratoi'n ddiogel ar gyfer ymchwiliadau, a'i hebrwng i/o'r theatr.

Adnabod sefyllfaoedd brys ac argyfyngus, ac ymateb yn briodol iddynt. 
Gofalu bod yr egwyddorion a nodir yn yr Hanfodion Gofal yn cael eu hymgorffori yn yr ymarfer dyddiol i sicrhau bod defnyddwyr y gwasanaeth yn cael gwasanaeth o safon uchel

Sicrhau bod cleifion a gofalwyr/pherthnasau yn rhan o'r gwaith cynllunio a darparu gofal, a bod credoau, hunaniaeth a hoffterau defnyddwyr y gwasanaeth yn cael eu cydnabod.

Sicrhau bod anghenion cleifion yn cael eu diwallu trwy weithio ar y cyd â gweithwyr proffesiynol eraill ac asiantaethau, yn enwedig mewn perthynas ag anghenion gofal parhaus.

Yn gofrestredig gyda'r Cyngor Nyrsio a Bydwreigiaeth i'ch galluogi i ymarfer yn eich proffesiwn, ac yn gweithredu'n unol â Chod Ymarfer y Cyngor. Bydd deiliad y swydd yn gyfrifol am sicrhau bod yr holl adnoddau yn yr ardal yn cael eu defnyddio yn y ffordd orau posibl.

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 12,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu i bron 400,000 o bobl ar draws chwarter ehangdir Cymru. Gwnawn hyn mewn partneriaeth a’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy:

4 prif ysbyty (Bronglais, Aberystwyth, Glangwili, Caerfyrddin, Tywysog Philip, Llanelli, ac Llwynhelyg, Hwlffordd).

5 ysbyty cymunedol (Ysbyty Dyffryn Aman ac Ysbyty Llanymddyfri yn Sir Gaerfyrddin, Ysbyty Tregaron yng Ngheredigion,Ysbyty Dinbych-y-pysgod a Chanolfan Adnoddau Iechyd a Gofal Cymdeithasol De Sir Benfro yn Sir Benfro.

Dwy ganolfan gofal integredig (Aberaeron ac Aberteifi, yng Ngheredigion). 
Cyfleusterau cymunedol, gan gynnwys:

48 Meddygfa, 49 Deintyddfa, 98 Fferyllfa Gymunedol, 44 Practis Offthalmig Cyffredinol (gan gynnwys gwasanaethau iechyd llygaid a golwg gwan), 38 safle yn darparu gwasanaethau iechyd meddwl ac anableddau dysgu, gofal o fewn eich cartrefi eich hun

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.